أنا و زمان ..

ممكن اكون بكتب الموضوع ده وانا شوية مكتئب او حاسس بندم علي اللي فاتني او زعلان لاني كان في ايدي حاجات كتيرة كان نفسي اعملها ولكني ما

عملتهاش....

والسبب هو أنا ممكن ايوه انا ساعات بقصر في حق نفسي.

زمان يعني كنت ممكن ابقي لاعب كبير في كرة اليد ايوه انا كنت بحب اللعبة ديه جدا وكنت موهوب فيها جدا لكن انا مسمحتش لنفسي ابقي كده ....

كنت ممكن اسافر امريكا اشتغل زي ما أنا كان طول عمري نفسي اعمل ولكن برضه ماسفرتش ليه عشان انا سمعت كلام الناس برضه انا دائما ضد انا ...

وحاجات كتيره كنت ممكن اعملها وكنت عاوز اعملها بس انا كنت ضد انا ..

ولكن ما تفتكرش ان المشكلة في" انا " بس الموضوع اكبر من كده ممكن يكون داخل فيه ظروف مجتمع وطبعا ماتنساش ان الانسان مننا بيتفاعل مع مجتمعه في نطاق ظروفه المحيطة .. ده يقول كلمه تسمع له ... دول يقول كلمه ويفضلوا يزنزا تصدق ..

لكن ارجع في الاخر وأقول ان العيب الاول الاخير كان في انا .

لاني مادفعتش عن نفسي انا اتنزلت عن معتقداتي واهدافي عشان خاطر الناس وده ما يمنعش ان الظروف كمان كان ليها دور معايا مش مهم ..

المهم انك تعرف انك عاوز ايه .. حارب عشانه ايوه حارب زي ما بتحارب عشان تدخل الاستاد...

زي مابتحارب في طابور عشان تدخل السينما او حتي تجيب رغيف عيش ..
حارب عشان اهدافك .. اهدافك بتاعتك مش بتاعة الناس ... مقتنع اشتغل عشان تحقق اقتناعك ..

نجاحك مسؤليتك انت .. انت المسؤل عن تحقيقه ..

اوعي يجليك احباط ....وقعت قوم ....

مرضت شوية مسيرك هتخف ... وفي الاخر احب اقولك كلمة ..

" حلمك انت اللي حلمته وانت اللي هتحققه "