ما بين الصحافة والعقيدة واللاعب المؤمن

لقد مر علي انتهاء البطولة الافريقية وفوز المصريين بها اكثر من عشرة ايام و ما من مصري يستطيع أن ينسي الحالة الوطنية والمشاعر الفياضة والقلوب التي كانت تنبض علي انغام النشيد المصري ؟؟!! وما من مصري يستطيع ان ينسي شوارع المحروسة وهي تموج تيمنا وهياما في حب الوطن ؟؟!! من منا لم يقفز تحفزا لتمريرة زيدان؟!من منا لم يقفز فرحا بهدف الموهوب الهادئ ابو تريكة ؟؟!! من منا لم ينتشي بهذا الفوز المصري الخالص ؟ من منا لم يشعر بالفخر والعالم كله يتحدث عن التجربة المصرية ؟ لقد كانت تلك البطولة بالفعل حدوتة مصرية ...
مرت الايام وكلنا في حالة فرح غير عادي ولكن للاسف لم تدم تلك الفرحة كثيرا لنا جميعا فقد خرج علينا العديد من الصحفيين والنقاد والمحللين بأفكار تبعث علي الشك في مستوي الصحفين والمحللين الرياضين ومستوي ثقافتهم واستنارتهم فتارة تري قائل أن " الانتصار الذي حققه المنتخب المصري هو انتصار عقيدة وإيمان قبل أن يكون فوز كروي "
مأساة بكل المقاييس عندما يتم الحديث الاعلامي علي هذا المستوي من الجهل وهذا المستوي من الفكر فكيف استطاع ذلك الفاضل اختزال العقيدة في فريق لكرة القدم ؟؟ فهل من عاقل يقبل بذلك ؟؟؟؟؟!!!! هل اصبح الهاجس الديني اكبر من ندرك قيمة العقائد والاديان علي مختلف مذاهبها واتجاهاتها فبكل بساطة هل يمكن لنا القول ان العقيدة الاسلامية(مصر ) قد هزمت من العقيدة المسيحية ( فرنسا ) في ديار فرنسا بخمسة اهداف مقابل لاشئ !!!! غير ممكن وغير مقبول ...
هل ممكن ان نقول ان فشل النتخب المصري في التأهل الي كاس العالم بسبب ضعف في العقيدة ...!!! هل اصبحنا نتحدث لكي نرضي الثقافة والطبقة الشعبية التي تحتاج الي طبقة مثقفة مدركة حكيمة تقود هذه الجماهير... اي عبث هذا ....
هل يمكن لنا ان نطلق علي لاعب انه الاعب المؤمن ولاجل ذلك قد حققنا الفوز.. هل مولانا الشيخ هذا هو الذي كان يرسل القوات السمائية التي تلعب وتحرز الاهداف؟؟!! هل بركاته هي التي صنعت هدف الفوز بالبطولة!! أم ان كان هناك لاعب مقاتل اسمه زيدان ..
هل حسن شحاته هذا كان رجل طيشة مالوش لازمة عشان بركة الاعيبة هي اللي جابت الفوز ولا خطط بقي ولا لا حاجة اسمها علم التدريب ولا اي حاجة كلة بسبب بركات لاعب او كل اللعيبة أي منطق هذا أين الجهد والعمل والتفاني تلك القيم الانسانية اين اليس للعلم دور... الا يمكننا القول ان الاتزان الروحي للاعبين ساعدهم علي اداء مباريات دون ضغوط مضرة واثقين ان تلك القوة الالهية التي يؤمنوا بها سوف تعطي لهم ما هو خير لهم ..وفقط .. فلنكف عن المبالغة وتضخيم عامل الاتزان الروحي وتجاهل بقية العوامل ...
فالنضع المور في حجمها الطبيعي ..
واخيرا لكل من يصر ان يفكر بهذا الاسلوب ....
لماذا لم تفوز السعودية أو الفاتيكان أو إسرائيل بكأس العالم لاي من الالعاب للكبار؟؟؟؟!!!
فهل كل هذه العقائد التي تعتنقها الدول علي ضلال ؟؟؟!! بالطبع لا ........

تعاطفا مع الشعب المصري 1

انهارده يا جماعة يوم تاريخي ورياضي يمكن يكون وصل بيا إلي مستوي المنافسة علي ميدالية ذهبية في بطولة بكين الاولمبية القادمة..
إزااااي؟؟؟!! هقولك انا ياسيدي الحكاية من أولها ...
نص بيان ألقته أنا علي نفسي بمناسبة بداية الترم الثاني من الدراسة :
" بسم الله الذي يرعي كل صنوف البشر ويحافظ علي سلامة طبقات الشعب الكادحة .. إن هذا الترم من العام الدراسي كان لابد له ان يشهد نقطة تحول هامه في تاريخي كمواطن مصري ، فقد قررت أن اتنازل كليا ونهائيا عن جميع وسائل الراحة المتعلقة بوسائل المواصلات والمتمثلة في عدم الاشتراك في خدمة الباص التي تقدمها الكلية، وبذلك يتوجب علي ان اعود الي صفوف الجماهير المصرية الكادحة في سبيل البحث عن استقلال وسائل المواصلات المناسبة والمطلوبة وان هذا القرار نهائي لا رجعة فيه
والله ولي التوفيق "
ومن هنا ياجماعة بدأت الحكاية كل يوم كنت بنزل في ميعادي - بدري حبتين - وكانت وسائل المواصلات شبه سهلة وآدامية
انهاردة بقي اتأخرت حوالي نصف ساعة عن ميعادي المعتاد نزلت حوالي الساعة 7،5 صباحا متوجها إلي وسيلة المواصلات الاكثر شهرة وهي المترو وكانت معايا تذكرة كنت قاطعها قبل كده وبالتالي موقفتش في الشباك وقفت علي محطة المترو بتاع دقيقة كده لاقيت الناس كترت! قلت ياواد طنش خالص ..إن شاء الله تركب المترو وتروح زي ماأنت عايز لحد كده الامور بيس-peace - بالنسبة ليا
حبتين كمان الناس كترت اكثر !!! قلت ياواد طنش خالص.... والمترو متأخر والناس عماله تزيد المحطة زحمة موت وكما إيه اللي بيغظني اكثر تصرفات بعض الشباب الللذيذ اللي طبعا كلكم عارفينهم......هيه هيه هبه... ياه المترو جاي مافيش مشكلة الناس كلها هتركب بس من غير ما نزق ونضرب بعض المترو جه وفعلا عمكو مازقش حد واستني لحد ما الناس نزلت والناس ركبت وببص لاقيتني واقف علي الرصيف وكل اللي علي الرصيف ركب وما فيش مكان في العربية الناس وقفة علي خط الباب ..يا جماعة حبة جوه عايز اركب.. ولا حياه لمن تنادي .. يا جماعة ده انا مارضتش ازق وعملت زوق !! مش قضيتنا هذا كان رد الشعب رد الشعب قلت خلاص استني المترو اللي بعده .... قعدت والحمد لله المكافأة كانت سمائية ومافيش يدوبك.. مترو جاي وراه علي طول الحمد لله اشكرك يا رب اكيد فاضي .. وقف المترو بصيت لاقيت المترو زحمة برضه يمكن زي الاولاني .. قلت لنفسي سيبك ياواد من حبتين التحضر اللي عملهم لازم تركب حشرت نفسي وزقيت الناس ووقفت علي خط الباب( علي نفس الخط زي اللاعب الغير متسلل) وبالعافية الباب قفل بعض ما اتخبط في دهري مش مهم .....المترو كان الجو نار كأنه بالصلاة علي النبي كده صوبة يتزرع فيها محاصيل الصيف!!!! والالذ ان الناس محدش طايق حد وطبعا عمكم مطنش وعمال اقوم بحركات مناورات عشان الناس اللي طالعة واللي نزلة وكانت اصعب المناورات اللي تتعلق بالسيدات اللي طالعة واللي نازلة !!! كانت مناورات محتاجة لمهارات.. ووكانت ولا مناورات الخليج والنجم الساطع ما علينا ما انا الغلطان اني نزلت متأخر
نزلت محطة منشية الصدر وماقولكوش علي كمية البشر كنت ماشي جنب حرف الرصيف وبيني وبنكم كنت خايف لو حد لمسني حبقي تحت ربنا ستر وعدت علي خير وخرجت من محطة المترو وكلي ثقة ان المعاناه خلاص وباذن الله اركب اتوبيسي المفضل.. ولكن جاءت الرياح بما لا تشتهي السفن .. خرجت من محطة المترو وخير اللهم اجعله خير كده زي ماتقول ..شايف زي رصيف مليان كمية بشر رهيبة وكانوا كلهم باصين اخر الشارع . استنتجت بذكائي ان البشرية ديه مستنية اتوبيسات زي انا الغلبان !! وقفت مع الناس وقلت اكيد الاتوبيسات متاخرة وهاتيجي ورا بعض والناس هتقل والرصيف يخلالي.. عشان اركب اتوبيسي المفضل وفعلا لاول مرة في هذا اليوم الموعود النبؤة تتحقق والاتوبيسات هلت ورا بعض و الناس اللي كانت واقفة علي الرصيف الحمد لله قاموا بتمارين الصباح تحت اشراف عمو سائق الاتوبيس !! وبرعاية هيئة النقل العام الراعي الرسمي للمواطن المصري الرياضي ولكن للأسف .. ببص حوليا لاقيت ناس اكتر من الناس الاولانية واقفة علي الرصيف مستنية ..وكنت واقف بسلي نفسي بيني وبين نفسي بضحك علي الناس اللي بتجري واللي بيزق واللي بيقعواللي واقف علي الباب اللي قدام المخصص للنزول وبيتوسل للسائق انه يفتحله وعمو السائق عامل عبيط مش واخد باله كوميديا الموقف فعلا- تقول ايه عدواني بقه - .. وفجأة اتوبيسي المفضل جاي والرصيف زحمة والناس مستنية لاقيت نفسي لا اراديا بجري ورايح ناحية اتوبيسي المفضل ....
بس يا جماعة فمنذ أن رأيت اتوبيسي المفضل من أول الشارع انجذبت إليه انجذاب الحديد الي المغناطيس فمع وجود جماهير غفيرة تعمق هذا الاحساس جريت والاتوبيس المضل لم يقف ولكني للاسف لم انجح فالجماهير قد ركبت قبل ان يتوقف بعدين انا بقي قلت ايه خلاص ان شاء الله اركب الاتوبيس المفضل اللي بعده .... مطولش عليكم قول طول .... جه التاني جريت برضه وراه مديت ايدي امسك الحديدة اللي علي الباب عشان ادفع نفسي في الاتوبيس اني اقترب تماما فالمسافة اقل من متر وتقل وتقل همسك خلاص ...وبعد ما كنت خلاص فجأة لاقيت زميل من قوي الشعب المكافح اداني كتف كتف مش قانوني بعدت عن الباب والناس كلها اتشعبطت وانا مش عارف اركب وواقف بره الباب واصرخ ياجماعة وسعوا ادوني فرصة .. عايز اركب .. رجلك ياكابتن شوية .. والاتوبيس ابتدي يسرع . وانا بهادي ياجماعة ,وللأسف مافيش جماعة .. وماركبتش برضه.. الدم ماضربش في نافوخي ولا حاجة كل اللي عملته اني وقفت علي الرصيف زي الاهبل عمال اضحك علي نفسي وعلي الناس اللي حوليا... فكرت اني اركب المترو واروح اركب من حتة تانية وفعلا نفذت الفكرة لكن بعد ما فاتني أو بصراحة ماعرفتش اركب عدد اتنين اتوبيس وبذلك يكون العدد 4 محاولات فاشلة في استقلال وسيلة مواصلات ممكن تقرا وتقول اني ببفشر عليكو لكن بأمانة هوه ده اللي حصل ...
ورحت ركبت المترو عشان انزل العتبة واخد الاتوبيس المفضل بعد مايفضي ركبت المترو بدون معاناه هذه المرة كان فعلا فاضي مصدقتش نفسي واعصابي ارتاحت شويه نزلت محطة رمسيس دورت علي الخريطة المتعلقة وفعلا لاقيتها والحمد لله ..بس كانت ممسوحة تماما " من فضلك لو سمحت هو محطة العتبة اتجاه شبرا ولا الجيزة " كلمة طلعت مني لمواطن زميل كان مستني علي المحطة وجاء الرد اسرع مما اتوقع " لأأأ اتجاه الجيزة طبعا " ..نزلت وركبت زي ما الزميل قال.. قرأت المحطات إيه ده ده العتبة اتجاه شبرا وجريت ناحية الباب عشان انزل ولكن.. ..كان الباب كان اسرع مني.. رحت مسرة ورجعت تاني للعتبة وأنا كلي احباط وركبت من هناك اتوبيس مش مفضل وقلت انزل واخد التوبيس المفضل وطبعا الامر ماخلاش من محاولة فاشلة أخري طبعا في ركوب اتوبيسي المفضل ....
وطبعا رحت الكلية متأخر بس ماقولكوش ضحكت ضحك علي نفسي و أنا عمال احكي لاصحابي عن اللي حصل وفجاة اتنكدت واكتئبت مش عشان البهدلة اللي شوفتها.. عشان صورة الراجل العجور.. واللي كان عنده اعاقة جسدية... وهو مش عارف يجري ويركب والاصعب من كده ان الناس كلها كانت بتزقه وتخبطة.. وكان ناقص يدوسوا عليه.. و هديت شوية وشكرت ربنا لانه انقذه من البهدلة و ناس اخدت تاكسي وركبوا هذا العجوز المسكين معاهم ...
ورحلوا وتركوا وراءهم العديد من الاسئلة التي لا نريد نحن الشعب ان نجيب عنها ...

تعقيبا علي مانشر بمدونة بنت مصرية ..

تعقيبا علي مانشر بمدونة http://www.bentmasreya.net/node/96 بنت مصرية
نحن مع انه لايقبل أو يجوز ولا يصح ان يموت شعب جوعا مهما كان هذا الشعب

اولا ما حدث مع اختراق الحدود المصرية قبل الاخيرة ادي الي تهريب متفجرات الي مصر
وقد كشف الامن ان مجموعة فلسطينية هي التي قامت بتفجيرات نويبع ودهب.

ثانيا ماحدث للجنود المصريين علي الحدود امر غير مقبول فقد كان ينشر يوما ما يقارب من 30
مصاب لمدة 3 ايام - بحسب المصدر الرسمية والله اعلم - وكان كل يوم وهناك حالات حرجة

ثالثا من يمكن له ان يقنعني ان حماس فقدت السيطرة علي المتظاهرين وهي حركة مسلحة فمن هو
الذي احضر البلدوزرات واشرف علي هدم السور الحدودي

رابعا انه من غير المقبول ان يتعامل معنا اي دولة او اي حركة بسياسة الفرض والاجبار فمصر اكبر من ذلك

خامسا انه من غير المقبول دخول اسلحة واحزمة ناسفة وقنابل يدوية الي الاراضي المصرية احنا مش ناقصين

سادسا من غير المقبول ان يتم رفع العلم الفلسطيني علي الاراضي المصرية تحت اي مسمي

سابعا من غير المقبول ان يتم النصب علي المصريين باستخدام العملات المزورة او بغيرها من الاساليب

ثم ان دماء ابناء واجداد المصريين التي سالت علي الرمال المصرية من اجلنا نحن ومن اجل استقلال تراب الوطن فلا يمكن لنا الان ان نسمح للحركات ان تتحكم في تراب هذا الوطن أو ان تسول لنفس اي إنسان غير مصري ان يفرض نفسه علي هذه الارض فإذا ارادت حركة حماس العمل علي مساعدة الفلسطنيين لحلت مشكلة وازمة معبر رفح مع حركة فتح .
وبالنسبة لموضوع الغاز المصري الي اسرائيل فإن اسرائيل لم تدخل بماكيناتها وتفرض علينا تصدير الغاز فهي علي الاقل لم تتوغل داخل حدود السيادة المصرية مع اعترافي الكامل انه كانت بلا شك ضغوط علي الحكومة المصرية في هذا الامر واخيرا إن كنا مقتنعين أن القرار المصري غير مستقل وغير حر فهل لنا ان نسمح بالتدهور اكثر؟؟ وان تكون هناك عدم استقلال واحترام للسيادة للاراضي المصرية؟؟ هو احنا غاويين نرجع للوراء؟!

اكتشافات .. واسرار الخلطة..

ان ماحققه المنتخب الوطني المصري هو بمثابة صدمة بكل ما تحمله الكلمة من معاني فبعد ان فقد ابناء الوطن الثقة وتلاشت من افكارهم معاني الامل والطموح والثقة والقدرة اعاد المنتخب الوطني المصري تلك المعاني معني الصمود معني الكفاح اعاد قيمة التضحية والتفاني فبعد أن كانت كل فئات الشعب لا تري في نفسها القدرة علي العمل والنجاح والوصول للقمة او حتي محاولة الوصول إليها استيقظنا نحن ابناء هذا الوطن وإذا بنا نجد ان منا 30 مواطن مصري يحققوا لهذا الوطن الفخر ويرفعوا اسمه عاليا مدافعين ببسالة عن هدفهم في رفع هذا العلم المصري الذي نعيد اكتشاف جماله مع كل انتصار تحققه كتيبة النجاح هذه شكرا لكم ... بفضلكم نثق الان في قدراتنا .. بفضلكم اسعدتم الشعب .. واعدتم اكتشاف قدرات المواطن المصري ..
فهل تستوعب الحكومة الدرس من المنتخب المصري لكرة القدم فها هو الشعب الذي تشتكي من مهاجمته لها ينحني ابجالا وتقديرا لمن يعمل بجد .. لمن يسعي وراء هدفه .. لمن تشعر الجماهير بحبه لها .. فليكن هناك هدف قومي معلن ولتكن هنالك نية حقيقية في القيادات الحكومية بتحقيق هذا الهدف !!! وليكن معلوما ان توافرت المصداقية وصارت النوايا صافية سوف نعيد اكتشاف اكثر من 80 مليون مواطن مصري حقيقي
فلتكن هناك اهداف واقعية ونية صافية مع القليل من المصداقية سوف نصل الي ابعد مما نتصور ..

الجميل والاسعد ..

كنت قاعد في امان الله ع النت بقرا اخبار حقوق الانسان في مصر وتتابع الاحداث الراهنة استوقفني اسم قريته وزي ماتقول كده حسيت بكرشة نفس وقولت لنفسي خير اللهم اجعله خير اسم جميل وسعد ومفيش اجمل واسعد منه من سلالة بني ادم راجل اصلي دورة يهاجم الكنيسة وخلاص واللي عليه انه يدعي انه بيفهم في الشريعة المسيحية - علي حد تعبيره - وتقوله فيه واحد قال آه عشان اضرب يقولك بثقة تنم عن ثقافة رهيبة عميقة دفينة -ومن كتر دفنها يظهر انها عفنت منه - " الأجندة الامريكية " وطبعا ليه حق مش الكلام ده هو اللي بيعجب المجتمع الغير مثقف الذي نعيش فيه ذلك المجتمع الذي يملك من الهوس الديني الشكلي الذي لا تأثير له بل أن كل عاقل متروي يلاحظ حالة الانحطاط العام وعلي جميع الاصعدة طبعا ما احنا خلاص من عظمتنا ومجدنا انه بقيت امريكا متربصة بينا نعم امريكا تبحث عن مصالحها ولكن ليس كما نتوهم فنحن قد فقدنا الدور علي جميع الاصعدة - مش موضوعنا -
وهذا الجميل والسعيد يطلقوا عليه - يارب يطلقوا عليه كمان وكمان- لقب المفكر القبطي وكأن كل الاقباط ال15 مليون مفهمش واحد بيفكر ومستنيين هذا الاتعس عشا يجي ويفكرلهم حاجة تجنن واللذيذ في الموضوع انه عايش الدور والاعلام المصري خاص او حكومي معاه واحب اقولهم ارحمونا عايزين تعرفوا رأي الاقباط اختاروا حد يكون فعلا بيعبر عن رأيهم مش لاقيين انزلوا الشارع اسألوا الناس وبلاش تفرضوا علينا استنباط من قوالب الفكر الرجعي ومن الاخر اجمل اسعد لا تحسبوه علي الاقباط عشان اسمه بيعفرتهم وصورته في التلفزيون بتعكنن عليهم ...
ربنا يرحمنا ..

جــدل شــوارعــــي جـــــــدا

مواطن مصري بسيط ..كل همه يلاقي رغيف.. يارب علي بابك..

مواطن غلبان.. والفرحة نسيان..

تقوله وطن يقولك فين؟؟.. تقول بلد يقوللك وين؟؟؟!!!

شعور غريب يحاصرني وانا ماشي في شوارع المحروسة اوقات كتيرة بحس ان الشعب غريب عن البلد وممكن تقول انه مش عايش في البلد ، الناس ماتفهمش استسلموا للتهميش ويمكن يكون المواطن- اللي هو انت وانا - بنهمش نفسنا قصد وعند مش حاسيين بقيمة البلد ، لا مش بلدكوا اللي في الصعيد لا قصدي مصر ..
واحد يقوم الدنيا و مايقعدهاش عشان راجل ليه فكر مخالف ليه .....
وياسلام لو كلمتوا عن عملية السلام يقولك احلي كلام.. تهليل وتصفير.. ولا كأننا في مولد سيدي البربر.. مافيش سلام مع القتلة والمعتدي!! علي ارضنا تقوله ياعم ارض مين ماخلاص اخدناها يقولك الطموح الاستعماري معلن ومش منتهي واقرا كيت وكيت وكيت - مع العلم انه اساسا مافيش حد بيقرا في مصر - تلاقيك كده ببساطة تصدق وتقول اما الراجل ده وطني اوي ومابيقبلش حد يجيب سيرة مصر بشر يااااه
تمر الايام والحدود يتفتح فيها صغرة طب قولي ياعم رايك إيه ؟ يقولك هذا العدو الغاشم وتلك الدولة المزعومة وهذا الكيان غير مرغوب فيه نحمله المسؤلية تقف تقوله ياعم ده مش هو ده اللي عمل كده الناس اللي بتقول عليهم اخوانك يقولك لأأأأأأأأأأ ده مخطط وفخ اتعمل عشان نقع فيه - افتراض ان اخوانه اغبياء عشان وقعوا في اللي ظابطهم مخطط له - ماشي ياعم عندك حق وبرضوه راجل وطني مخلص محب لبلدك ..
يمر اسبوع اثنين ثلاثة هب يامعلم ألحق فيه ايه تفجير في سيناء ... بتقول إيه ؟؟ .. يرد عبقري زمانه أنها عملية قام بها العدو وهو متورط فيها زي ما صرح الجنرال ترتر قائد قواتهم فهذا العدو ضالع .. ماشي ياعم مصدقك .. يمر يوم اتنين ساعة ساعتين ... جماعة من اخواننا الاشقاء تعلن عن تبني هذا الهجوم وتتبناه وتباركه والبركه في الثغرة اللي اتعملت ودخلت بلاوي رأيك ايه ياعم الكتكوت ؟ ديه قلة قليلة ومهما حصل احنا اشقاء.. ابصله واتعجب واتنرفز واقوله انت ناسي صاحبنا اللي اضرب بالجزمة وهو قدام المسجد بالجزمة ياراجل صاحبنا اللي بيمثلك ويمثلني .. يقولي بثقة عجيبة ديه قلة اقل من القلة الاولانية ....
تمر الايام والحال هو الحال والفكر في مكانه لا حراك ويجي اشقائنا الحلوين سواء كانوا من حركة هناء او شرين ويطربقوا الحدود علي دماغ اللي جاب المصريين ويدخلوا ويكلوا ويشربوا ويسرقوا وينهبوا ويزوروا ويهربوا للمحافظات وده طبعا مش معناه انهم يدخلوا وايديهم فاضية ويجمولنا بكام حزام ناسف وكام كيلو مواد متفجرة مشكل وكام رشاش - بجد مش بتاع ميه - طبعا مالازم اخوانا تجاملنا يجي صاحبنا عايز يتكلم عن السيادة والعزة والكرامة صرخت في وشه وقولتله ياعم ارحم اللي جابوني بتبرر ايه الحدود وهدوها وداخلين بسلاح ومتفجرات ولا كأنه كيلو خيار والبجاحة يرفعوا علمهم علي ارضنا والادها يموتوا ويصيبوا اكتر من 80 جندي وعسكري مصري ..إيه البجاحة ديه فليذهب الجميع الي الجحيم سواء دول او دول وتبقي مصر حرية ابيه سيادتها قوية بايد اولادها العفية واللي يرش جندي بلدي بالدم ارشوا بميه النار .. ارفع صوتك وقول معايا ...
مصر ياحبي .. يا حتة من قلبي

مصراوي وبس .. وكــلـه علي الـلـه

مخنوق مضايق حاسس انه لا يوجد من يعيش علي ارض مصر العزيزة يمكن له ان يستمع او يتعاطف مع مواقفي وارائي الحياتية .
لا الهدف ثورة او فورة .. كل الحكاية رأي .. توافيقني أو تخالفني الرأي أنت حر .. اجدادك احرار .. متنورين.. عالمين .. دارسين محترمين .. معلمين الانسانية معني الحضارة .. معني البحث العلمي .. معني العمل .. معني الجد .. معني و قيمة الحب.. حب الوطن حب الارض .. حب العمل .. حب الاسرة .. حب الحبيبة .. والأهم هو حب فن حب الحياة ..كلها افكار. متلاحقة متسابقة اسسها الاجداد ويتناساها الاحفاد.. بقصد بدون قصد كلها مطروحة للنقاش.. والهدف منها الاختيار.. اختيار اسلوب حياة نؤسسه ونحيا به انت وانا القاصي والداني.. فدعونا نطرح الافكار بدل من ان تكون حياتنا قوالب من لا مفر.، ممكن تلاقي فكرة نقطة عبيطة ..وغيرك يشوف فيها قوية عميقة.. دعونا نتحاور ولا نتشاجر.. دعونا نعبر عن اراءنا دعونا نعبر الي مستقبل افضل دعونا نهتم باحوالنا وحياتنا وسياسة حياتنا فلننظر الي احوالنا من اجل اخواتنا ..فلنتعلم من ماضينا من أجل حاضرنا .. فلنؤسس لمستقبلنا من اجل عزة حاضرنا.. فلنحفر الوان علم بلدنا داخل وفي عمق اذهاننا ..فالنبدأ الان ونعلم ان هذا الوطن لايحتاج إلا إلا إنسان مصري. مصري بمعني الكلمة فقط
فهل انا وانت هو ذاك المصري ..؟؟
..فالنبدأ الحوار ونطرح الافكار ..وكــله علي الـلـه