سؤال مهم ممكن يكون عبيط بس خليك معايا وفكر . الناس في المترو أو وسائل المواصلات بتعمل ايه ؟؟ سؤال مهم تقولي ليه ؟ عشان لو فرضنا أن المواطنين المصريين بيقضوا في وسائل المواصلات ساعتين يوميا - مجرد فرض - ولمدة ستة ايام في الاسبوع ،
يبقي كدة المواطن المصري بيضيع 12 ساعة في الاسبوع يعني 48 ساعة في الشهر في المواصلات يعني576 ساعة في السنة في المواصلات .
تعالوا بقي كدة نشوف ال 576 ساعة بتتقضي إزاي ممكن واحد تلاقيه ثقافته عاليا وبيقرا اخبار الرياضة .. ومش بيقهم حاجة غير الرياضة يعني576 ساعة في السنة رياضة يعني خلال السنة راسه ممكن تتحول لكرة كفر..
واحد تاني بقي مختلف تماما كل اللي بيعمله واقف بيدور علي الجنس الاخر عشان يعاكسه ويتفرج عليه ويا سلام لو حد منهم ركب معاه تلاقي اعراض التحول تظهر ويتحول نظراته إلي نظرات نارية والمشكة الاظرف انه يبصلك ويعمل كأنه مافيش حاجة ..يا ولد ..عيب عليك... علي عمو برضة ... يعني راسه تلاقيها اكبر من اكبر كتاب جنسي نزل في العالم وبكده يكون قضي 576 ساعة من عمره في البصبصة ..
و الاغلبية العظمي بقي تلاقيها واقفة كده مابتعملش حاجة غير انها بتتفرج علي بعض .. ناس واقفة مفيش منها اي فائدة كل اللي قادرين عليه واقفين ، وبالتالي ظهر تأثير الحالة علي مستوي الذكاء المصري ... تخيل انت 576 ساعة في السنة المخ كل الللي بيعمله يسرح!! .. مما قد يولد حالة من الغباءوالعته الشديد ..
اما الشباب علي طول مختلف تلاقي السماعة في الاذن وسلوكها ما تقدرش تحدد نهايتها والشاب واقف بيسمع إيه ؟؟ . أكيد المطرب المتهرب من الجيش ولا المطرب بتاع هالة وممكن كمان يتعطف علي اللي حواليه ويسمعهم غصب عن عينهم معاه ...
وتلاقي مجموعات سواء من الشباب او الكبار واقفين بيرغوا وينموا يتكلموا عن محمد وجورج والسياسة والاقتصاد و كثيرا ما يكون الحديث عن الدين ..اللذيذ في الحوارات ديه انك تلاقي الكل بيتكلم في اي حاجة بدون ثقافة كله بيفتي سمع كلمتين من واحد قبلة بيرددهم في نفس الموضوع حوارات غبية ونميمة بدون معني ولا هدف لها ولا خلفية ...
واخيرا تلاقي واحد لابس ابيض في ابيض ماسك القران في ايديه وعمال يقرا بصوت عالي أو لو مش في ايديه تلاقية عمال يحرك فكيه قال ايه الواد حافظ حتي المسحيين يمسكوا كتب الصلوات بتاعيتهم ويقروها في المواصلات، يعني خلاص التدين متمكن من الشعب ده وتلاقيهم هم هم الناس اللي بتاخد رشاوي وعمرها ما اشتغلت بضمير وذمة .. مأساة بكل المقاييس ..
وبكده اكون نقلت ليكم صورتكم وانتوا راكبين المواصلات خلال 576 ساعة في السنة بالذمة ده كلام ياراجل ... شوف كام ساعة من عمرك هتقضيها في المواصلات ليه بقي تسكت وتستسلم للسلبية وتهرب من تحمل مسؤلية نفسك !!!!!
...... كان معكم مصري وبس من اي وسيلة مواصلات ....
ليست هناك تعليقات:
إرسال تعليق